Buxara, Səmərqənd, Xarəzm və Nişapurda ona Əbu Əli ibn Sina deyirdilər. Avropada isə onu Avisenna kimi tanıyırlar. O vaxtlar ən savadlı adamlar belə inanırdılar ki, Yer yastıdır və hərəkət etmir, qızılı "fəlsəfə daşı” nın köməyilə yəni yalançı kimyagərlərin uydurduqları üsul ilə əldə etmək olar, "abi həyat” (dirilik suyu) hər bir xəstəliyi sağaldır, qocaları cavanlaşdırır. Astronomiya, coğrafiya, fizika, kimya kimi elmlər isə hələ təzəcə öyrənilməyə başlanırdı. İbn Sina hələ 10 yaşında ikən cəbr, həndəsə hətta fəlsəfə barədə yaxşı təsəvvürə malik idi. Göydəki bütün ulduzları tanıyırdı və öz sualları ilə müəllimlərini çətin vəziyyətə salırdı. 12 yaşlı uşağı  Buxarada qanunların ən yaxşı bilicisi sayırdılar. Qocalar da onun yanına məsləhətə gəlirdilər. Lakın ibn Sina hesab edirdi ki, riyaziyyat və fizika, astronomiya və fəlsəfə həyatdan uzaq elmlərdir. Çiçək xəstəliyi və vəba hər yanı bürümüşdü, minlərlə adam bu xəstəliklərdən məhv olurdu. İbn Sina belə qərara gəldi ki, insanları müalicə etməlidir. O zaman  meyiti yarmaq qəti qadağan idi. Bu qanunu pozanlar cəzalandırılır və sürgün edilirdilər. Odur ki, Şərqdə həkimlik edən ən təcrübəli şəxslər belə insanın ürəyini, qaraciyərini, ağciyərini görməmişdi, qan dövranı sistemi haqqında təsəvvürləri yox idi. İbn Sina başa düşürdü ki, insanı kor-koranə müalicə etmək olmaz. Buna görə o, gizlincə meyitləri yararaq insan bədəninin quruluşunu öyrənməyə başladı.

                                                                                             İbn Sina

Tez bir zamanda bu gənc həkimin şöhrəti Buxaraya və Xarəzmə yayıldı. Çoxları onun şagirdi olmaq istəyirdi. O, şagirdlərinə təkcə insanları müalicə etməyi öyrətmirdi, onlarda insana mərhəmət hissi də tərbiyə edirdi.

Təbabət elmində təcrübəsini eləcədə də fəlsəfə, riyaziyyat, astronomiya və kimya sahəsində geniş biliklərini İnb Sina özünün "Müalicə elmi kitabı", "Tibb elminin qanunu"  və "Bilik kitabı" ("Danişnamə")  və bir sıra əsəsrlərində şərh etmişdir.

İbn Sina bədii yaradıcılıqla da məşğul olmuş ərəb və fars dillərində şerlər, fəlsəfi-alleqorik povestlər yazmışdır. Bu əsərlərində o, insanları elm və maarifə, mənəvi-əxlaqi təmizliyə çağırırdı. İnb Sina bütün Şərqdə, o cümlədən bütün Azərbaycanda "Loğman" adı ilə məşhur olmuş, haqqında çoxlu rəvayətlər yazılmışdı. Azərbaycan  filosofu  Bəhmənyar İbn Sinanın istedadlı tələbələrindən olmuşdur.